01 Oct Cartelle acolle un encontro da Comisión Executiva do Fondo Galego coas defensoras centroamericanas de dereitos humanos
O Concello de Cartelle foi escenario este 30 de setembro dun emotivo encontro entre a Comisión Executiva do Fondo Galego de Cooperación e Solidariedade e tres lideresas de Centroamérica que participan no programa Galicia Abriga, unha iniciativa de acollemento temporal para mulleres defensoras de dereitos humanos.
As activistas —Milagro Alvarado (El Salvador), Juventina López e Ana Donis (Guatemala)— compartiron os desafíos que enfrontan nos seus países pola súa loita pola igualdade, a xustiza e os dereitos das mulleres e pobos indíxenas. Durante tres meses, poderán descansar e fortalecerse en Galicia para continuar co seu labor á volta.
O encontro contou coa presenza dos alcaldes e representantes de Nigrán, As Neves e Cartelle, así como doutros representantes do Fondo Galego, que previamente celebraran unha reunión para facer seguimento do seu plan de actividades. Entre outros temas, abordáronse os proxectos internacionais en marcha e as vindeiras accións de formación e sensibilización.
O programa Galicia Abriga está impulsado pola Coordinadora Galega de ONGD co apoio do Fondo Galego, que destina 10.000 € a esta iniciativa solidaria.
O Fondo Galego está formado por 118 concellos, entre os que está o Concello de Cartelle representado polo concelleiro Daniel Fernández Carril, e as catro deputacións, promovendo desde hai 28 anos a cooperación ao desenvolvemento e a solidariedade internacional desde o municipalismo galego.
